Morning Cry: Judaisky Cares

MONRING CRY

Baba God, day Don break
And I never break mouth.
E get as e dey do me for
Body like say mosquitoes
Don suck my blood finish.
Baba na when e go better?

E go better, e go better na so
2019 waka pass like criminal
Wey get government backup.
I Don dey hope so tey my
Shadow Don dey doubt if na
Suffer him come suffer with me.

Baba, na me my neighbours
Dey drop their keys come go
Work unto say I dey stay for
House like watchman wey
Dem no dey pay salary.
E Don comot for child play o.

Fine girls think say I get money
Come dey call me fresh guy unto
Say I dey package myself with
Borrow borrow bend down and
Select. Na me and you know say
I just tall but my pocket no tall.

Baba God, shey you self no dey
Shame say I no dey give offering
For church unto say I no get?
Shuu! Na only me kill bros J-
Abi my second name na Job?
Baba reason my matter na, abeg.

I dey reason make I kill myself
But I no want make any yeye
Sombori come inherit my China
Phone weh I dey take dey give
Myself joy. Baba you no say
Poverty na sin, I wan repent.

I Don cry so tey tears Don dry
For my eyes, Chai, I Don die.
Baba sheby na you turn fish
To bank, abeg turn me to a
Fisher man cos I wan withdraw
Even if e get terms and condition.

Help my matter cos beggars
And church rat Better pass me.
Baba you no say na my ceiling
I dey count for night unto say
Sleep no gree come. Abeg,
I wan smile, na beg I dey beg.
~~~~~~~~~~~~~~~~~~~~
I stand at bay watching-
Learning the language of my ink-
Learning how to handle my pen.

JUDAISKY CARES

 1,221 total views,  2 views today

Author: Judaisky

Judaisky is a young writer who believes the world can only be saved PEACEFULLY through the tidings of the ink cos the pen is mightier than the sword. Do You want to know more about me, contact me 09039956005

Leave a Reply

Your email address will not be published. Required fields are marked *