PIDGIN POETRY: Five Seconds; Pen Vandal


Na FIVE seconds remain
Baba God, Na FIVE seconds remain
For you to look into my matter,
I done dey bang your gate with my prayer,
No look me trowey face, baba na FIVE seconds remain.

Just five seconds, brother Naaman turn small pikin
The woman wey them say get menopause get flowopause,
Baba, look into my case, I be your pikin
If you leave me, na who go run my course,
No be you feed people and body no shake you?

Baba, na three days remain ooh!
Even you know say na die minute person head dey boot wella inside exam hall
Na you say make them scream Jericho wall go fall
Even blindness and demon see you kawa ooh!

After all the bad belle, you comot uncle Job from grave
No be you give mummy Sarah her own package?
No be you still give the man for pool him own package?
No be you silent the noisy sea wey wan turn you into slave?

Choi! Baba, na you turn water into sweet wine na
Come join cure centurion servant and the noble man son,
Na you be the only fisherman wey pass all fishermen na
Baba, shuu, look me na, I dey wait for my own turn.

No be your scream make unclean spirits waka?
Even bros Peter mama fever shock when you show
The leper man begin dance soapy when you show
Even death wey dey form find root waka.

Choi! Baba, na wa ooh! You open two blind men eyes
No be you raise the widow son for Nain
Come make the pikin wey die shine eyes?
No be you again? Abi, you done change your name?

Baba, I know say you no dey do ojoro like man
Hear me na, I be your correct fan,
Na only your promo, no get terms and condition
Choi! No be you be oga at the top again?

Baba, na your correct score sure pass
Your pikin still dey wait, no look me pass
Give me my own package before the year pass
Arrange am for me, I dey wait, Baba FIVE seconds.


 522 total views,  2 views today

Author: Judaisky

Judaisky is a young writer who believes the world can only be saved PEACEFULLY through the tidings of the ink cos the pen is mightier than the sword. Do You want to know more about me, contact me 09039956005

4 thoughts on “PIDGIN POETRY: Five Seconds; Pen Vandal

Leave a Reply

Your email address will not be published. Required fields are marked *